ЦХИНВАЛ, 18 сен — Sputnik, Уалыты Диана. Хуссар Ирыстоны базарадон-сӕудӕджерадон палатӕ фыццаг хатт хайад райста Дамаскы ӕхсӕнадӕмон базарадон армукъайы Сирийы официалон ӕрхуындмӕ гӕсгӕ. Уый тыххӕй радзырдта Цхинвалы пресс-конференцийы рӕстӕджы базарадон-сӕудӕджерадон палатӕйы президенты хӕдивӕг Джыгкайты Вахтанг.
"Фыццаг балцы рӕстӕджы мах равдыстам Хуссар Ирыстоны базарадон-сӕудӕджерадон палатӕ, цӕмӕй фылдӕр радзурӕм нӕ бӕстӕйы тыххӕй ӕмӕ бафыссӕм бадзырдтӕ ахсджиаг ӕмбӕлттимӕ, кӕцытӕ цӕттӕ сты ӕмгуыстад кӕнынмӕ. Равдысты рӕстӕджы ауагътам баныхастӕ Хуссар-Африкайаг республикӕ, Бразили, Иран, Венесуэла ӕмӕ Хуссар Корейимӕ — алкӕимӕ дӕр баныхас кодтам бафыссын бадзырдтӕ базарадон палатӕты ӕмвӕзадыл", — радзырдта Джыгкайты Вахтанг.
Уый банысан кодта, зӕгъгӕ, армукъайы хайадисты сӕйраг фӕстиуӕг уыд Хуссар Ирыстон ӕмӕ Сирийы базарадон палатӕты ӕхсӕн бадзырды бафыст.
"Цыппӕрӕм бон мах фӕхуыдта Сириаг Арабаг Республикӕйы Базарадон палатӕты федераци. Фембӕлды рӕстӕджы бафыстам бадзырдтӕ. Уый у егъау политикон къахдзӕф — ахӕм стыр бӕстӕимӕ бадзырд у тынг ахсджиаг Ирыстонӕн", — бахахх кодта уый.
Джагкайты Вахтанг ма бафтыдта, зӕгъгӕ, иууыл сӕйраг фӕстиуӕг уыд Дамаскы центры Хуссар Ирыстоны фыццаг иудадзыг базарадон минӕварады баконд. Уый загъта бузныг президент Бибылты Анатолийӕн, кӕцыйы ӕххуысы руаджы сӕххӕст сты ахӕм фӕстиуджытӕ.
Дамаскы ӕхсӕнадӕмон армукъа у Ӕввахс Скӕсӕны регионы иууыл зӕронддӕртӕй иу. Хуссар Ирыстонӕй дарддӕр армукъайы хайад райстой Уӕрӕсе, Абхаз, Африкӕйы бӕстӕтӕ, Ӕввахс Скӕсӕн, Ази ӕмӕ Латинаг Америкӕйы минӕвӕрттӕ.
