ЦХИНВАЛ, 9 окт — Sputnik, Гӕбӕраты Ян. Хуссар Ирыстоны радтой Гуырдзыстоны ӕмбӕстаг сылгоймаг Майя Отинашвилийы, кӕцы ӕнӕзакононӕй ахызт паддзахадон арӕн, гуырдзиаг фарсы минӕвӕрттӕн. Раздӕр Ленингоры районы тӕрхондон рахаста уынаффӕ, цӕмӕй фыдгӕнӕджы дзырдӕй сбадын кӕной ахӕстоны иу азмӕ.
Амӕйразмӕ Хуссар Ирыстоны Паддзахадон ӕдасдзинады комитеты (ПӔК) арӕнгӕрон службӕйы кусджытӕ ӕрцахстой 37-аздзыд Майя Отинашвилийы Ленингоры районы цӕрӕн пункт Ӕмдзӕрины цур. Гуры муниципалитеты Хурвалеты хъӕуы цӕрӕг сылгоймаг ӕнӕзакононӕй ахызт Хуссар Ирыстоны ӕмӕ Гуырдзыстоны ӕхсӕн арӕны сӕрты сабаты, 29 сентябры. Афтӕ ма сбӕрӕг кодтой, Гуырдзыстоны ӕмбӕстаг сылгоймаг бирӕ рӕстӕг ӕхцайыл кӕй ӕххуыс кодта адӕмӕн ахизын паддзахадон арӕныл.
Тӕрхондон уынаффӕ куы хаста, уӕд ӕркаст цауы ӕууӕлтӕм — сылгоймаджы раздӕр никуы ӕрцахстой, басаст йӕ фыдракӕндыл, ӕххуыс кодта фӕдагуырдӕн, афтӕ ма йын ис ӕртӕ ӕнахъом сывӕллоны.
Уынаффӕ рахӕссыны фӕстӕ, сылгоймаджы радтой гуырдзиаг фарсы минӕвӕрттӕн Эргнеты хъӕуы цур.
