ЦХИНВАЛ, 19 окт — Sputnik, Плиты Фатимæ. Сывæллæтты сфæлдыстадон галуаны интеллектуалон хъазт "Зонды къуыбар" æрбакодта ног сезон. Ахуыры хорз бæрæггæнæнтимæ скъоладзаутæ сæхи фæлварынц Ирыстоны истори, æгъдæуттæ, ирон æвзаг æмæ литературæйæ, фехъусын кодта Sputnik галуаны педагог-организатор Битеты Марина.
Хъазт цæуы ирон æвзагыл.
"Ныридæгæн бæрæг сты хъазты 147 архайæджы, сæ минæвæртты нырма нæ бавдыстой Знауыры æмæ Цъунары скъолатæ. Архайынц дзы æрмæстдæр æстæмкъласонтæ, хъазт командон нæу, алчидæр хъахъхъæны йæхи зонындзинæдтæ. Иу турæй иннæмæ хизы, 19 хуры тын чи æрæмбырд кæна, уыдон", — загъта Битеты Марина.
Хъазт "Зонды къуыбар" конд у цалдæр турæй – æвзарæн, фыццаг, дыккаг æмæ финал. Ныридæгæн цæуынц хъазты æвзарæн туртæ.
"Ауагътам дыууæ хъазты, 23 октябры та интеллектуалон тохы бацæудзысты Ленингоры районы скъоладзаутæ. Районы дæрддзæфдзинад хынцгæйæ мах сарæзтам сæрмагонд уавæртæ ацы скъоладзаутæн æмæ иу боны дæргъы уыдонæн ацæудзæн цалдæр туры", — бафтыдта организатор.
Мадзалы финалисттæ – 24 адæймаджы бацæуынц чысыл академийы хъусджыты рæнхъытæм, цыппарæй та свæййынц уæлахиздзаутæ – "зонды къуыбæрттæ".
