ЦХИНВАЛ, 23 окт — Sputnik. Хуссар Ирыстоны президент Бибылты Анатолий йæхимæ райста цæрджыты, кæцытæ амæй размæ бахатыдысты æхсæнадон тæрхонуатмæ, хъусын кæны паддзахады сæргълæууæджы пресс-службæ.
Цхинвалы цæрæг Санахъоты Виталий фехъусын кодта президентæн, 2008 хæсты рæстæджы йæ хæдзар иууылдæр кæй ныппырх ис. Экспертты скъуыддзагмæ гæсгæ, хæдзарæн йæ 96% у пырх. Уæдæй нырмæ йе 'мкъаимæ цæрынц сæ хæстæджытæм.
"Ӕз 11-æм аз цæрын кæйдæр хæдзары. Разы дæн канд мæ хæдзар аразыныл нæ, фæлæ иухатæнон фатерыл дæр", — загъта уый.
Президент бахæс кодта Санахъоты Виталийæн ссарын фатер.
Ӕрсойты Раисайæн 2008 азы августы хæсты амард йæ лæг, йæ хæдзар та бахъыгдард, уый дæр бацыд йæ проблемæимæ президентмæ.
Президенты ныхæстæм гæсгæ, æндидзынгæнæн куыст райдайдзæн æрбалæугæ азы райдайæны.
"Азы райдайæны бавналдзысты уæ хæдзары арæзтадмæ æмæ фæуыдзысты дыууæ-æртæ мæйы æмгъуыдмæ. Хъыгагæн, кæд хæстæй бирæ рæстæг рацыд, уæддæр бирæ ис аразинаг. Мæнмæ дæ куырдиатмæ æнгæстæ ис 300. Ацы аз сарæзтой 50 хæдзары", — загъта Бибылты Анатолий.
Президент ма райста Цхинвалы цæрæг Гæбæраты Венерайы æмæ йæ чызг Тедеты Фатимæйы. Тедеты бинонтæ 7 адæймагæй 2008 азæй фæстмæ цæрынц æрдæгхæлд хæдзары.
Уавæр базонгæйæ президент бахæс кодта хæдзар сындзидзын кæнын 2019 азы.
