ЦХИНВАЛ, 25 окт — Sputnik, Плиты Фатимæ. Цхинвалы райдыдта æппæтреспубликон турнир шашкæтæй сылгоймæгтæ æмæ нæлгоймæгты ʻхсæн. Мадзал нывонд у фæскомцæдисон змæлды сæдæ азы юбилейæн, йæ организаторæй ралæууыд Цхинвалы районы администраци.
Хъазты архайынц 15 спортсмены, сеʻ хсæн спорты мастермæ кандидаттæ æмæ хицæн къæпхæны разряды хицæуттæ.
"Нæ ерыстæ нывонд сты фæскомцæдисон змæлдыл 100 азы сæххæстæн, архайы дзы фæсивæд дæр æмæ раздæры фæскомцæдисонтæ дæр. Нæлгоймæгтæ сты фæлтæрддæр хъазджытæ, сылгоймæгты ʻхсæн та ис бирæ фæсивæд. Уæлахиздзаутæ æмæ призертæ рабæрæг уыдзысты дыууæты ʻхсæн дæр", — загъта Sputnik шашкæты федерацийы сæргълæууæг Лолоты Борис.
Турнир цæуы зылдон системæмæ гæсгæ, 7 сылгоймаг æмæ 8 нæлгоймаджы бацыдысты карз интеллектуалон тохы. Фыццаг фембæлдтæ иууылдæр æмбулы æвзонг чызг Дудайы Карина.
"Шашкæтæй хъазын сæрмагондæй никуы ахуыр кæнын, фæлæ тынг уарзын ацы хъазт. Турниры дæр мæ нырма хорз амонд ис – дыууæ хъазты рамбылдтон, тырнын призон бынатмæ", — загъта Карина.
Турниры аннæ хъазæг Джиоты Павелы ныхæстæм гæсгæ, кæд уыдон Фæсивæды Коммунистон Цæдисы уæнгтæ уыдысты æмæ рацардысты советон дуджы, уæд фæсивæдæн та уыцы рæстæджытæ сты æнæзонгæ. уымæ гæсгæ, йæ хъуыдымæ гæсгæ, ахæм мадзæлттæн ис стыр нысаниуæг.
"Мах та радон хатт фæлварæм нæ тыхтæ, абон нын у спортивон бæрæгбон. Стæй ма мадзал Фæсивæды Коммунистон Цæдисæн нывонд кæй у, уый дæр хорз у, цæмæй ныры фæлтæртæ дæр зоной ацы змæлды тых æмæ нысаниуæг", — радзыдта хъазæг.
Турниры тæрхонгæнджытæ сты шашкæты федерацийы сæргълæууæг Лолоты Борис æмæ Тедеты Мадина. Тыхджындæр шашистты нæмттæ фæбæрæг уыдзысты боны кæрон. Æнхъæлмæ сæм кæсы майдантæ æмæ призтæ.
