ЦХИНВАЛ, 26 окт — Sputnik, Плиты Фатимæ. Хуссар Ирыстоны фæсивæдон политикæ, спорт æмæ туризмы комитет аразы экскурситæ Хуссар Ирыстоны фенддаг бынæттæм. Ныридæгæн уал æртæ къорды æрзылдысты республикæйы Ленингоры районы мæсгуытæ, музейтæ æмæ æндæр цымыдисон бынæттыл, фехъусын кодта Sputnik уагдоны хистæры хæдивæг Гатыгкоты Валентина.
Комитет бацæттæ кодта фондз маршруты, се ʻхсæн балцытæ Къуыдаргоммæ, Дзауы, Знауыры æмæ Ленингоры районтыл, стæй ма сæйраг сахары фенддаг бынæттыл.
"Балцытæ арæзт цæуынц Цхинвалы бирæпрофилон колледжы, нывгæнæн æмæ музыкалон ахуыргæнæндæтты студенттæн. Æртæ къорды уал акодтам Ленингоры районмæ, уыдон сæхæдæг равзæрстой экскурсийы маршрут. Куыддæр ног къорд æрæмбырд уа, афтæ та абалц кæндзысты райгуырæн бæстæйы æндæр фенддаг къуымтæм", — загъта уый.
Гатыгкоты Валентина ма радзырдта, балцыты фæсивæды бæстæйы цымыдисон бынæттимæ кæй зонгæ кæнынц комитеты специалисттæ. Радон къорд та уыдзæн музыкалон ахуыргæнæндоны студенттæй.
