ЦХИНВАЛ, 26 окт — Sputnik. Цӕгат Ирыстоны кӕронмӕ бахӕццӕ Ос-Бӕгъатыры цырты хуыздӕр проекты конкурс, радӕтта информацион портал 15 Регион.
Конкурс цыд Аланийы Чырыстон дины райстыл 1100 азы сӕххӕсты бӕрӕгбонмӕ цӕттӕкӕнынады фӕлгӕтты. Проекты нысан у ӕнустӕм сфидар кӕнын Аланийы фӕстаг паддзах — Ос-Бӕгъатыры ном, кӕцы тох кодта алайнаг адӕмы иудзинад, хӕдбардзинад ӕмӕ сӕрибардзинадыл.
Экспозицийы 19 авторы равдыстой 25 скульптурон эскизы. Жюрийӕн йӕ бон не ссис равзарын конкурсы уӕлахиздзауы: дыккаг бынат бацахстой Баскаты Сослан ӕмӕ Цхуырбаты Олег, ӕртыккаг бынат та Зӕнджиаты Таймураз ӕмӕ Кучиты Асланбег.
Конкурсы организатортӕ нысан кӕнынц проекты ахсджиагдзинад, фидӕны уыдон нывӕндынц ӕрбаздахын ахӕм мадзӕлттӕм ӕрмӕст скульпторты нӕ, фӕлӕ ма нывгӕнджыты дӕр. Ныртӕккӕ уадзынц баныхас Хуссар Ирыстонимӕ, цӕмӕй саразой Ос-Бӕгъатыры цырт Цхинвалы.
Конкурс сарӕзтой Цӕгат Ирыстоны нывгӕнджыты цӕдис, Истори ӕмӕ археологийы институт ӕмӕ ООО "ДальЛес".
