ЦХИНВАЛ, 5 ноя — Sputnik. Хуссар Ирыстоны милицийы кусджытӕ ӕрцахстой Цхинвалы районы Зары хъӕуы 80-аздзыд цӕрӕджы, кӕцы хылы рӕстӕджы ӕртхъирӕн кодта йӕ хъӕуккагмӕ хӕцӕнгарзӕй. Уый тыххӕй хъусын кӕны республикӕйы Мидхъуыддӕгты министрады (МХМ) пресс-службӕ.
"Цхинвалы районы радгӕсон хайадмӕ знон бацыд хъусинаг, Зары хъӕуы цӕрӕг кӕй ӕртхъирӕн кӕны хӕцӕнгарзӕй йӕ хъӕуккагмӕ. Цауы бынатмӕ уайтагъд ацыд Цхинвалы районы мидхъуыддӕгты хайады оперативон къорд, кӕцы ӕрцахста нӕлгоймаджы", — дзырдӕуы хъусинаджы.
Уагдоны банысан кодтой, зӕгъгӕ, барадхалӕгмӕ ссардтой Макаровы пистолет дыууӕ агъуд ӕмӕ нӕмгуытӕ.
Нӕлгоймаджы бакодтой районон мидхъуыддӕгты хайады рӕстӕгмӕдарӕн изолятормӕ, милици бӕрӕг кӕны цауы ӕууӕлтӕ.
