ЦХИНВАЛ, 12 ноя — Sputnik, Козаты Диана. Диабеты ныхмӕ тохы ӕппӕтдунейон бонмӕ Хуссар Ирыстоны рынчынтӕ райсдзысты лӕвӕрттӕ ӕмӕ ӕнӕфидгӕ консультаци. "Иугонд Ирыстон" партийы ӕххуысӕй республикӕйы сӕйраг эндокринолог Быценты Индира ӕмӕ парламенты спикеры ӕххуысгӕнӕг Гӕбӕраты Инара сфӕнд кодтой ауадзын акци сӕкӕры диабетӕй рынчын адӕмӕн, радзырдтой Sputnik партийы пресс-службӕйы.
Диабеты ныхмӕ тохы бон нысан кӕнынц ӕрвылаз 14 ноябры. Датӕ равзӕрстой, цӕмӕй скад кӕной инсулины ссарджытӕй иу Фредерик Бантингӕн, кӕцы райгуырд ацы бон 1891 азы.
"Парти балхӕдта лӕвӕрттӕ сӕкӕры диабетӕй рчынтӕн — сӕрмагонд хӕлцад ӕмӕ хостӕ. Быценты Индира медицинон кусӕг ӕмӕ парламенты спикеры ӕххуысгӕнӕгимӕ цӕуынц районтӕм, дӕттынц лӕвӕрттӕ рынчынтӕн ӕмӕ уадзынц ӕнӕфидгӕ консультацитӕ", — банысан кодтой партийы.
Дыууӕ бонмӕ уыдон ныридӕгӕн бабӕрӕг кодтой 50 адӕймаджы. Акци уагъд цӕудзӕн республикӕйы алкӕцы районы дӕр. 14 ноябры акци цӕудзӕн Цхинвалы. Уыцы бон 09.00-ӕй 11.00 сахатмӕ алкӕмӕндӕр уыдзӕн фадат бацӕуын дохтырмӕ ӕмӕ ауадзын ӕнӕфидгӕ басгӕрст.
"Афтӕ ма рынчынтӕ райсдзысты пакеттӕ сӕрмагонд хӕлцадимӕ", — банысан кодтой партийы.
Ӕппӕтдунейон ӕнӕниздзинады организацийы информацимӕ гӕсгӕ, сӕкӕры диабет ис низтӕй ӕртыккаг бынатыл, кӕцыты фӕстиуӕгӕн адӕм свӕййынц инвалидтӕ, кӕнӕ та амӕлынц.
