ЦХИНВАЛ, 12 ноя — Sputnik, Козаты Диана. Республикон бирӕпрофилон медицинон центры директор Кокойты Маирбег радзырдта Хуссар Ирыстоны парламенты депутаттӕн медицинон уагдоны куысты тыххӕй.
Хуссар Ирыстоны ацы аз сарӕзтой медицинон центр, кӕцы баиу кодта медицинон организацитӕ иу комплексы. Парламенты ӕнӕниздзинад хъахъхъӕнынад ӕмӕ социалон политикӕйы комитеты рабадт ацыд ивгъуыд къуыри, хъусын кӕны закондӕттӕн органы пресс-службӕ.
Кокойты Маирбег банысан кодта, медицинон центры скондмӕ кӕй бахызтысты сывӕллӕтты ӕмӕ республикон рынчындӕттӕ, гуырӕн хӕдзар, Цхинвалы горӕтон поликлиникӕ,Цхинвалы районон поликлиникӕ, туберкулезы ныхмӕ диспансер, тагъд медицинон ӕххуысы станц, дохтырон-физкультурон диспансер, буары-венерологон диспансер ӕмӕ тӕрхондоны-медицинон экспертизӕйы бюро.
"Центры архайды сӕйраг нысаниуӕг у ӕххӕст кӕнын цӕрджытӕн фыццаг медико-санитарон, сӕрмагонд, стыр технологон медицинон ӕххуыс", — банысан кодта уый.
Кокойты Маирбег радзырдта депутаттӕн проблемӕты тыххӕй дӕр, кӕцытӕ фӕзындысты куысты рӕстӕджы ӕмӕ фехъусын кодта, кӕцы кадртӕ ис медицинон центры, кӕцытӕй та сты цух.
Депутат Уалыты Роза радзырдта республикон рынчындоны донифтонгады тыххӕй. Уый фехъусын кодта, зӕгъгӕ, сараздзӕн алцыдӕр, цӕмӕй аскъуыддзаг кӕна ацы проблемӕ.
"Ӕз зонын, рынчындоны кӕй нӕй хъарм дон, ӕмӕ рынчынтӕ сӕхи тыхтӕй хъарм кӕнынц дон сӕхи найынӕн. Мӕнӕн, куыд депутат ӕмӕ адӕймагӕн, кӕцы никуы ныууагъта йӕ фыдыбӕстӕ, мӕ хӕс у саразын алцыдӕр, цӕмӕй аскъуыддзаг кӕнӕм ацы проблемӕ", — загъта депутат.
Комитеты сӕргълӕууӕг Козонты Алан банысан кодта, ацы фарстыл раздӕр дӕр кӕй ныхас кодтой парламенты сессийы рӕстӕджы, ӕмӕ хицауад куы бадӕтта сметӕ, уый фӕстӕ паддзахадон бюджетмӕ бахӕссдзысты ивындзинӕдтӕ.
Ӕнӕниздзинад хъахъхъӕнынады фарстыты фӕдыл уӕрӕсейаг уынаффӕгӕнӕг Хуссар Ирыстоны Игорь Галь банысан кодта, зӕгъгӕ, ныртӕккӕ скъуыддзаг цӕуынц фарстытӕ, цӕмӕй саразой электроэнерги, техникон ифтонгад ӕмӕ лифты хӕдзарады системӕтӕ.
