ЦХИНВАЛ, 19 ноя — Sputnik. Хуссар Ирыстоны президент Бибылты Анатолий хайад райсдзӕн Донецкы Адӕмон Республикӕйы сӕргълӕууӕг Денис Пушилины инаугурацийы церемонийы, фехъусын кодта къуырисӕры Sputnik паддзахады сӕргълӕууӕджы пресс-секретарь Гасситы Дина.
"Республикӕ Хуссар Ирыстоны президент Бибылты Анатолий хайад райсдзӕн бӕрӕгбонон мадзӕлтты, кӕцытӕ нывонд сты Денис Пушилины инаугурацийы церемонийӕн", — загъта Гасситы Дина.
ДАР хицауад хъусын кӕны, Бибылты Анатолий ныридӕгӕн кӕй ӕрцыд Донецкмӕ. Денис Пушилины инаугурацийы церемони ацӕудзӕн 20 ноябры.
ДАР ӕмӕ ЛАР сӕргълӕуджытӕ ӕмӕ депутатты ӕвзӕрстытӕ ацыдысты 11 ноябры. Республикӕйы сӕргълӕууӕджы номыл тох кодтой фондз кандидаты, се хсӕн ДАР сӕргълӕууӕджы хӕстӕ ӕххӕстгӕнӕг Денис Пушилин. Хъӕлӕсдӕттыны фӕстиуджытӕм гӕсгӕ, Денис Пушилин рамбылдта ӕвзӕрстытӕ.
Фарон майы РХИ ӕмӕ ДАР лидертӕ Бибылты Анатолий ӕмӕ Александр Захарченко бафыстой Донецкы хӕларад ӕмӕ ӕмгуыстады фӕдыл бадзырд.
