ЦХИНВАЛ, 22 ноя — Sputnik. Цхинвалы цӕрӕджы гӕнӕн ис сбадын кӕной дыууӕ азмӕ ахӕстоны хӕдтулгӕ нозтджынӕй скъӕрыны тыххӕй — ӕвзонг лӕппуйы дыккаг хатт ӕрцахстой ахӕм фыдракӕнды тыххӕй, хъусын кӕны Хуссар Ирыстоны Мидхъуыддӕгты министрады (МХМ) пресс-службӕ.
"Фӕндагон змӕлды ӕдасдзинад ӕххӕст кӕныны мадзӕлтты рӕстӕджы Паддзахадон автоинспекцийы инспектортӕ ӕрурӕдтой Джиоты Аланы проспектыл ВАЗ-2109 хӕдтулгӕ, кӕцыйы скъӕрдта горӕты 21-аздзыд цӕрӕг. Барадхалӕджы аластой республикон наркологон диспансермӕ, цы ран сбӕрӕг кодтой, шофыр кӕй у нозтджын", — дзырдӕуы хъусинаджы.
МХМ банысан кодтой, зӕгъгӕ, нӕлгоймаджы раздӕр дӕр ӕрбаздӕхтой административон бӕрнмӕ ахӕм фыдракӕнды тыххӕй. Уӕд тӕрхондон рахаста уынаффӕ, цӕмӕй йӕ сбадын кӕной ахӕстоны 10 суткӕмӕ.
