ЦХИНВАЛ, 10 дек — Sputnik. Цӕгат Ирыстоны дыууӕ адӕймаджы фӕмард сты Дзӕуджыхъӕуы ГЭС-ы каналмӕ ныххауыны фӕстӕ, хъусын кӕны РИА Новости республикӕйы Уӕлвӕткон уавӕрты министрады ныхӕстӕ.
"15.14 сахатыл нӕм цӕстӕйфенӕгӕй ӕрбацыд информаци, ГЭС-ы доны кӕй ныххаудтой дыууӕ адӕймаджы. Цауы бынатмӕ ацыдысты 13 адӕймаджы ӕмӕ техникӕйы 3 иуӕджы", — дзырдӕуы хъусинаджы.
Фыццаг ирвӕзынгӕнджытӕ ссардтой иу нӕлгоймаджы мӕрдон буар, цӕмӕй иннӕ ссарой, уый тыххӕй каналы дон ауагътой.
"Ауагътам дон — дыккаг мӕрдон буар дӕр ссардтам. Кусӕм йӕ сисыныл. Дыууӕ нӕлгоймаджы. Бӕрӕг кӕнӕм сӕ гоймагдзинад", — фехъусын кодтой уагдоны.
