ЦХИНВАЛ, 14 дек — Sputnik. Хуссар Ирыстоны столицӕйы милицийы кусджытӕ ауагътой ацы аз фыццаг рейд пиротехникӕ ӕнӕзакононӕй уӕй кӕныны фӕдыл, хъусын кӕны республикӕйы Мидхъуыддӕгты министрады (МХМ) пресс-службӕ.
Милицийы кусджытӕ басгӕрстой горӕты цалдӕр дукани ӕмӕ не сбӕрӕг кодтой фехӕлдтӕ.
"Мах уадзӕм профилактикон куыст дуканиты хицӕуттимӕ, пиротехникӕйы реализаци тобӕгонд кӕй у, уый фӕдыл ӕмӕ сӕ фӕдзӕхсӕм. Дуканиты ӕнӕзаконон пиротехникӕ куы уӕй кӕной, уӕд сӕ ӕрбаздӕхдзысты административон бӕрнмӕ, сӕ продукци та сын скуынӕг кӕндзысты", — бахахх кодта милицийы капитан Остъаты Олег.
Рейдтӕ уагъд цӕудзысты республикӕйы районты дӕр, уыдон адаргъ уыдзысты ногазон бӕрӕгбӕтты кӕронмӕ.
Профилактикон мадзӕлттӕ уагъд цӕуынц мидхъуыддӕгты министры уынаффӕмӕ гӕсгӕ Хуссар Ирыстоны территоримӕ ӕнӕлегалон пиротехникӕйы ласыны фӕдыл. Хуссар Ирыстоны мидхъуыддӕгты органты ахӕм мадзӕлттӕ уадзынц ӕрвылаз дӕр.
