ЦХИНВАЛ, 24 дек — Sputnik, Плиты Фатимæ. Сывæллæтты æмæ æрыгæтты боксы скъолайы хъомылгæнинæгтæ æртæйæ ссисты æппæтуæрæсейон боксы фестивалы уæлахиздзаутæ, ноджы ма иу лæппу та райста æвзист. Уый тыххæй фехъусын кодта Sputnik спортсменты тренер Куымæридтаты Родион, кæцы акодта фæсивæды турнирмæ.
Ӕппæтуæрæсейон боксы фестиваль æрæмбырд кодта 2001-2010 гуырд 180 спортсмены.
"Лæппутæ стох кодтой иттæг хорз, мах куыд фæнд кодтам афтæ. Сыгъзæрин майдантæ райстой Санахъоты Андрей, Хуыбылты Азамат æмæ Гæджиты Гурам, æвзист майданы хицау баис Кокойты Лев – финалы уый фæхæрд ис тæрхонгæнджыты дих уынаффæмæ гæсгæ", — загъта Куымæридтаты Родион.
Ӕппæтуæрæсейон боксы фестиваль ацыд Липецкы областы горæт Елецы 19-22 декабры.
