ЦХИНВАЛ, 28 дек — Sputnik, Плиты Фатимæ. Ног азы къæсæрыл хуссарирыстойнаг амалиуæггæнæг сæххæст кодта къуындæг физикон авналæнтимæ сывæллæтты ногазон бæллицтæ. Амалиуæггæнæг Чабиты Натальяйы хæрзаудæн акци аххæссыд 3 сывæллоныл, фехъусын кодта хæрзаудæн фонд "Пусть всегда будет солнце"-йы президент Наталья Жуйкова, кæцыйы æххуысæй ацыд ногазон акци.
Хæрзаудæн акцитæ Ног азы агъоммæ Хуссар Иры цæуы æрвылаз, мадзæлттæ фылдæр бæрцæй аххæссынц интернаттыл æмæ сывæллæтты хæдзарыл.
"Амалиуæггæнæг, дукани "Эрман"-ы бардарæг Чабиты Наталья йæхæдæг равдыста хъæппæрис сæххæст кæнын æртæ сывæллоны ногазон бæллиц, йæ фадæттæ æххæссыдысты уый бæрц сабиæн баххуыс кæныныл. Нæ фонды хъусдарды бын цы сабитæ ис, уыдонæй æртæйæ ныффыстой фыстæджытæ Митын Дадамæ, ног азы къæсæрыл райстой сæ лæвæрттæ", — загъта Наталья Жуйкова.
Амалиуæггæнæг Чабиты Натальяйы зонындзинæдты бæрæгбонмæ дæр сарæзта хæрзаудæн акци, уæд уый баххуыс кодта 8 сывæллонæн – 5 сентябрьмæ балхæдта скъолайы формæ.
