ЦХИНВАЛ, 16 янв — Sputnik, Плиты Фатимæ. Хуссар Ирыстоны уæвæг уæрæсейаг æмбæстæгты цæдис сиды æвзонг кæсджыты æхсæнадæмон конкурс "Живая классика"-йы националон этапы хайад райсынмæ, фехъусын кодта Sputnik цæдисы сæрдар Наталья Жуйкова.
"Хуссар Ирыстоны уæвæг уæрæсейаг æмбæстæгты цæдис уадзы æвзонг кæсджыты æхсæнадæмон конкурс "Живая классика"-ы æвзарæн этап. Конкурсы хайадисæджы хъæуы бакæсын уæрæсейаг, науæд та фæсарæйнаг фыссæджы уацмыс уырыссаг æвзагыл. Аив кæсынæй сæ тыхтæ бавзарын сæ бон у канд цæдисы уæнгтæ æмæ сæ зæнæгæн нæ, фæлæ æппæт Хуссар Иры цæрджытæн 10-æй 17 азы кары онг", - загъта цæдисы сæрдар Наталья Жуйкова.
Уый ма банысан кодта, Хуссар Ирыстоны минæвæрттæ ивгъуыд аз дæр кæй архайдтой ацы конкурсы, "уæд нæ минæвар ахызт æрдæгфиналмæ".
Куырдиæттæ ист цæудзысты 2019 азы 23 январьмæ электронон адресыл natashazhuykova@mail.ru.
Æвзарæн этап ацæудзæн 15 февралы.
