ЦХИНВАЛ, 25 янв – Sputnik, Козаты Диана. Хуссар Ирыстоны Паддзахадон æдасдзинады комитет рабæрæг кодта гуырдзыстойнаг æмбæстæгты, кæцытæ æнæзакононæй цардысты республикæйы территорийыл, хъусын кæны уагоны пресс-службæ.
Нысан цæуы, Паддзахадон æдасдзинады комитет рæстæгæй рæстæгмæ кæй уадзы мадзæлттæ фæсарæйнаг æмбæстæгты æнæзаконон миграци аиуварс кæныны фæдыл.
"Комитет 22-24 январы рабæрæг кодта Гуырдзыстоны æхсæз æмбæстаджы, кæцытæ сæ нацимæ гæсгæ сты азербайджанæгтæ. Уыдон республикæйы территорийыл цардысты æнæзакононæй æмæ куыстой амалиуæгады къабазы - базарады хаххыл. Законмæ гæсгæ, уыдон феддæдуар кодтой республикæйæ", - радзырдтой пресс-службæйы.
Уагдон фæдзæхсы, Хуссар Ирыстоны территорийыл æнæзакононæй цы фæсарæйнаг æмбæстæгтæ цæрынц, уыдон æфхæрд кæй цæудзысты.
