ЦХИНВАЛ, 15 фев — Sputnik, Плиты Фатимæ. Хуссар Ирыстоны фӕсивӕдон политикӕ, спорт ӕмӕ туризмы комитеты сӕрдары хӕдивӕг Гатыгкоты Валентина хорзӕхджын ӕрцыд Уӕрӕсейы президенты зӕрдылдарӕн майдан ӕмӕ грамотӕйӕ Сочийы уагъд цӕуӕг IX-ӕм дунейон студентты ӕмӕ фӕсивӕды фестивалы организацийы тыххӕй.
Бӕрзонд хорзӕх Гатыгкоты Валентина райста Уӕрӕсейаг минӕвар Цхинвалы Марат Кулахметовӕй майрӕмбоны, Цхинвалы.
"Ацы хорзӕх мӕнӕн у ӕнӕнхъӕлӕджы ӕмӕ тынг ӕхсызгон. Ӕрӕджы мӕм минӕварадӕй фӕдзырдтой , загътой кӕй мын дӕттынц Владимир Путины номӕй хорзӕх. Мӕн рахицӕн кодтой 2017 азы Сочийы уагъд цӕуӕг IX-ӕм дунейон студентты ӕмӕ фӕсивӕды фестивалы тыххӕй. Уӕд дзы Хуссар Ирӕй хайад райста 50 адӕймаджы, ӕз уыдтӕн къорды разамонӕг", - загъта Гатыгкоты Валентина.
Уӕрӕсейы президент Владимир Путины барамындӕй 2017 азы кӕрон фидаргонд ӕрцыд IX-ӕм дунейон студентты ӕмӕ фӕсивӕды фестивалы зӕрдылдарӕн майдан.
