ЦХИНВАЛ, 20 фев — Sputnik, Плиты Фатимӕ. Хуссар Ирыстоны столицӕйы ацӕудзӕн Тедеты Ибрагимы ӕмӕ Тедеты Владимиры призтыл Аланийы чемпионат уӕгъдибар хъӕбысӕйхӕстӕй. Спортивон мадзалмӕ фӕуазӕг уыдзысты Уӕрӕсейы зындгонд богалтӕ – олимпиаг ӕмӕ дунейон ерысты уӕлахиздзаутӕ, фехъусын кодта Sputnik Хуссар Ирыстоны спортивон хъӕбысӕйхӕсты Федерацийы вице-президент Дзабиты Дмитрий.
Ерыстӕ цӕудзысты Спорты галуан "Олимп"-ы, 24 февралы.
"50 богалы ерысты архайдзӕн Цӕгат Ирӕй, 100-120 бавдисдзӕн Хуссар Ирыстон. Спортивон мадзалмӕ фӕуазӕг уыдзысты олимпиаг чемпион Абдулрашид Садулаев, дунейы чемпионаты уӕлахиздзаутӕ Цӕболты Хетӕг ӕмӕ Сидахъты Зауыр, Европӕйы чемпионтӕ Байцаты Владислав ӕмӕ Найфонты Артур ӕмӕ ӕндӕртӕ", - загъта Дзабиты Дмитрий.
Уый ма банысан кодта, ерыстӕ цӕудзысты иу боны дӕргъы. Турнир барӕсугъд кӕндзысты концертон программӕйӕ Цӕрыкъаты хотӕ Фатима ӕмӕ Альбина.
Аланийы чемпионат уӕгъдибар хъӕбысӕйхӕстӕй ацӕудзӕн дыккаг хатт, фидӕны та йӕ фӕнд кӕнынц саразын ӕхсӕнадӕмон форматы.
