Хуссар Ир рӕстӕгмӕ бакодта Гуырдзыстонимӕ арӕн

© Sputnik / Наталья АйриянХуссар Ирыстон ӕмӕ Гуырдзыстоны ӕхсӕн арӕн
Хуссар Ирыстон ӕмӕ Гуырдзыстоны ӕхсӕн арӕн - Sputnik Хуссар Ирыстон
Рафыссын
Арӕн бакодтой ӕрмӕст иуырдӕм, Гуырдзыстонӕй Хуссар Ирыстоны территоримӕ никӕй ӕрбауадздзысты

ЦХИНВАЛ, 20 фев — Sputnik, Козаты Диана. Хуссар Ирыстоны къухдариуӕгад рӕстӕгмӕ бакодта Гуырдзыстонимӕ арӕн республикӕйы Ленингор ӕмӕ Дзауы районы, фехъусын кодта Sputnik Паддзахадон ӕдасдзинады комитеты (ПӔК) арӕнгӕрон службӕйы сӕргълӕууӕджы хӕстӕ ӕххӕстгӕнӕг Алиханты Валериан.

Арæн - Sputnik Хуссар Ирыстон
Арæнгæрон службæйы хистæр радзырдта "хуыты гриппы" ныхмæ мадзæлттыл

Хуссар Ирыстон ӕмӕ Гуырдзыстоны ӕхсӕн арӕн уыд ӕхгӕд 11 январӕй фӕстӕмӕ "хуыты гриппы" тыххӕй. Арӕн сӕхгӕнын аскъуыддзаг кодта республикӕйы Ӕдасдзинады совет, Гуырдзыстоны гриппы вирус H1N1-ӕй дӕс адӕймагӕй фылдӕр куы фӕмард, уый фӕстӕ.

"Арӕн сӕхгӕнын аскъуыддзаг кодта Ӕдасдзинады совет, цӕмӕй вирус ма апарахат уа Хуссар Ирыстоны территорийыл. Гуырдзыстоны бирӕ ӕмбӕстӕгтӕ, се хсӕн сывӕллӕттӕ, ӕрцыдысты уазӕгуаты сӕ хиуӕттӕм. Ӕдасдзинады совет рахаста уынаффӕ, цӕмӕй ауадзой вакцинаци ацы ӕмбӕстӕгты ӕхсӕн", - загъта Алиханты Валериан.

Йӕ ныхӕстӕм гӕсгӕ, вакцинаци уагъд ӕрцыд, инкубацион период дӕр фӕцис, ӕмӕ уый фӕдыл республикӕйы къухдариуӕгад рӕстӕгмӕ бакодта уадзӕн пункттӕ Ленингор ӕмӕ Дзауы районы, цӕмӕй адӕм ацӕуой сӕ хӕдзӕрттӕм.

Гуырдзыстонимӕ арӕны уадзӕн пункттӕ байгом сты ӕртыццӕджы 6.00 сахатыл.

"Арӕн уыдзӕн гом ӕртӕ боны, уадзӕн пункттӕ кусдзысты ӕрвылбон 6.00 сахатӕй 20.00 сахатмӕ. 22 февралы изӕры арӕн сӕхгӕндзысты", - банысан кодта Алиханты Валериан.

Арӕнгӕрон службӕйы сӕргълӕууӕджы хӕстӕ ӕххӕстгӕнӕг банысан кодта, зӕгъгӕ, арӕн бакодтой ӕрмӕст иуырдӕм, Гуырдзыстонӕй Хуссар Ирыстоны территоримӕ никӕй ӕрбауадздзысты.

Уый ма бафтыдта, паддзахадон арӕн Ленингоры районы кӕй ахиздзысты 176 адӕймаджы, Синагур ӕмӕ Карзманы та 16 ӕмбӕстаджы.

Цхинвалы скъолатӕ ӕмӕ сабидӕтты нырма дӕр ис карантин, ахуыргӕнӕндӕттӕ райдайдзысты кусӕн иннӕ къуыри.

Ног хабӕртты лентӕ
0