ЦХИНВАЛ, 18 апр — Sputnik, Плиты Фатимӕ. Цхинвайлаг спорты галуан "Олимп"-ы хуыцаубоны ацӕудзысты ерыстӕ ленк кӕнынӕй. Фӕсивӕд ерыс кӕндзысты 100 метры дистанцийыл, фехъусын кодта Sputnik РХИ Ленк кӕныны федерацийы президент Евгения Терлеева.
Ерыстӕ ацӕудзысты 21 апрелы.
"Спортсментӕ дих уыдзысты 6 къордыл. Скъолайон стартты рафӕлгъаудзысты тыхджындӕр ленкгӕнджыты хицӕн кары къордты комплексон ленк кӕнынӕй 100 метры дистанцийыл", - загътаТерлеева.
Уый банысан кодта, ныридӕгӕн ма сӕхи цӕттӕ кӕнынц фӕсарӕйнаг турниртӕм дӕр.
"28 апрелы цӕуӕм Казаньмӕ ӕппӕтуӕрӕсейон ерыстӕ "MadWave Challenge 2019"-ы æлхынцъгæнæн этапмӕ. Майы астӕу хистӕр кары спортсментимӕ ацӕудзыстӕм Ставрополы крайы гом турнирмӕ. Ӕмӕ майы кӕрон та нӕхӕдӕг ӕрфысым кӕндзыстӕм Хуссар Ирыстоны президенты призтыл турниры архайджыты", - бафтыдта тренер.
Ленк кæныны федерацийы хистӕр Евгения Терлеева Хуссар Иры кусы дыууӕ азы бӕрц, йӕ куыстӕн йын бӕрзонд аргъ скодтой ивгъуыд аз – 2018 азы бӕрӕггӕнӕнтыл ӕнцойгӕнгӕйӕ Спорты комитет уый рахицӕн кодта преми "Тренер года"-йӕ.
