ЦХИНВАЛ, 30 апр - Sputnik, Гӕбӕраты Ян. Хуссар Ирыстон у иунӕг республикӕ, цы ран Стыр Фыдыбӕстӕйон хӕсты ӕбӕрӕгӕй фесӕфӕг хайадисджыты ссарыны тыххӕй бадзурынц мыггӕгты минӕвӕрттӕм, радзырдта Sputnik пресс-конференцийыл культурӕйы министр ӕмӕ "Ӕнӕмӕлгӕ полк"-ы организатор Хуссар Ирыстоны Зассеты Жанна.
Цхинвалы Уӕлахизы бон 9 майы Театралон фӕзуатыл уагъд ӕрцӕудзӕн ӕрвылазон цыд "Ӕнӕмӕлгӕ полк". Бӕрӕгбонон акцийы хайад райсдзысты мингай адӕм, кӕцыты ӕхсӕн республикӕйы къухдариуӕгады уӕнгтӕ дӕр.
Фыццаг хатт ацы акци уагъд ӕрцыд Томскы. Культурӕйы министр бахахх кодта, зӕгъгӕ, Хуссар Ирыстоны уыд фыццаг фӕсарӕйнаг бӕстӕты ӕхсӕн, кӕцытӕ хорзыл банымадтой ацы хъӕппӕрис.
"Нӕ штаб ӕмгуыстад кӕны аст организациимӕ, кӕцытӕн ис советон солдатты тыххӕй архивтӕ, ӕмӕ мах кусдзыстӕм цалынмӕ ӕбӕрӕгӕй фесӕфджыты иууылдӕр ма ссарӕм, уӕдмӕ", - банысан кодта Зассеты Жанна.
Акци "Ӕнӕмӕлгӕ полк" Хуссар Ирыстоны уагъд цӕуы дыууӕ этапы: фыццаг, офицерон полчы, раивы "удӕгас". Цыдмӕ рахизынц адӕм, кӕцытӕ 1989-2008 азты фесӕфтой сӕ хиуӕтты республикӕйы хӕдбардзинады тыххӕй хӕсты рӕстӕджы.
"Парад ацӕудзӕн Сталины уынджы уылты ӕмӕ базилдзӕн Харебаты Исахъхъы уынгмӕ. Акци ӕцӕгдӕр уыдзӕн масштабон. Паддзахадон кусджытӕ нын ӕххуыс кӕнынц, дзуапп кӕнынц нӕ фарстытыл", - загъта министр.
Азтӕ цӕуынц, ӕмӕ Стыр Фыдыбӕстӕйон хӕсты ветерантӕ цъусӕй-цъусдӕр кӕнынц. Ивгъуыд мӕй ӕртӕ ветераны ахицӕн сты сӕ цардӕй.
Традицимӕ гӕсгӕ, уӕлдӕр командӕгӕнӕг 9 Майы агъоммӕ арвиты ветерантӕм бадзырд, цӕмӕй ӕрбацӕуой бӕрӕгбонон мадзӕлттӕм.
