ЦХИНВАЛ, 24 май — Sputnik, Плиты Фатимæ. Хуссарирыстойнаг дизайнер Бекъойты Хох бавдисдзæн йæ куыстытæ æрвылазон æхсæнадæмон конкурсы "FASHION Битва"-ы æвзарæн этапы Дзæуджыхъæуы. Мадзалы рацæудзысты коллекцитæ – "Вторая любовь" æмæ "Fashion squad"-æй дарæс, фехъусын кодта Sputnik дизайнер йæхæдæг.
Бекъойты Хох у иунæг дизайнер Хуссар Ирæй, кæцы архайы æхсæнадæмон равдыстты.
"Дзæуджыхъæуы цæудзæн конкурсы æвзарæн этап, архайдзæн дзы 8 дизайнеры. Ам æвзæрст чи рацæуа, уыдон ацæудзысты Мæскуымæ 15 декабры финалон хаймæ. Конкурсмæ бавдисдзæн мæ дыууæ коллекци – "Вторая любовь" æмæ "Fashion squad"-æй фæйнæ æхсæз "look"-ы", - загъта Бекъойты Хох.
Конкурсæн бындур æвæрд æрцыд 2016 азы журнал "Esque"-йы æмархайдæй.
Модæйы дунейы Бекъойты Хох йæ архайд райдыдты 2016 азы, бантыст ын бацæттæ кæнын æртæ коллекци – "Наваждение", "Вторая любовь" æмæ "Fashion squad", уый бæрц райста хорзæхтæ дæр. Уыд ын равдыст Цхинвалы. У Хуссар Ирыстоны иунӕг фӕсивӕдон журнал "CXINVAL magazine" редактор ӕмӕ дизайнер.
Мадзал цæудзæн 26 майы Дзæуджыхъæуы.
