ЦХИНВАЛ, 30 май - Sputnik, Гæбæраты Элина. Хуссар Ирыстоны кæронмæ бахæццæ сты II Ӕхсæнадæмон ерыстæ ленк кæнынæй президенты призтыл. Турнир уагъд цыд 28-29 майы, хайад дзы райстой сæдæйæ фылдæр спортсмены Хуссар Ирыстон æмæ уæрæсейаг горæттæй - Ессентуки, Кочубеевское, Невынномысск, Пятигорск æмæ Черкесскæй.
Ерыстæ уагъд цыдысты дæс дистанцийыл.Чызджытæ æмæ лæппутæ архайдтой дыууæ кары къордты. Финалон ленчытæм бацыд президент Бибылты Анатолий дæр. Уый раарфæ кодта турниры хайадисджытæн æмæ сын йæ цæст бауарзта æнтыстытæ.
"Тынг æхсызгон нын у, кæй нæм æрцыд спортсментæ Уæрæсейæ. Ӕхсызгон нын у, кæй рæзы нæ ерысты æвæзад, куыд хуыздæр кæнынц нæ ленккæнджыты фæстиуджытæ - уый у прогресс. Бузныг республикæйы ленккæныны федерацийы хистæр Евгения Терлеевайæн йæ куысты тыххæй", - банысан кодта Бибылты Анатолий.
Евгения Терлеева дæр хъусдард аздæхта, æхсæнадæмон ерыстæ кæй ацыдысты ныр дыккаг хатт, дарддæр та кæй суыдзысты æрвылазон.
"Нæ ерыстæ ацыдысты бæрзонд æмвæзадыл, мæ зæрдæмæ фæцыдысты нæ ленкгæнджыты ралæудтæ. Уыдонæй бирæтæ ссисты финалисттæ, призертæ. Фæхуыдтам Цæгат Ир, Абхаз, Донецк æмæ Луганскы ленкгæнджыты дæр, фæлæ уыдонæн сæ бон нæ бацис æрцæуын", - радзырдта федерацийы хистæр.
