ЦХИНВАЛ, 11 июн — Sputnik, Плиты Фатимæ. Сывӕллӕтты ӕмӕ ӕрыгон фӕсивӕды боксы скъола рабӕрӕг кæндзæн хуыздӕр боксерты æртæ категорийы. Тыхджындæрты номыл тох цæудзæн дыууæ боны дæргъы Спорты скъолайы стыр залы, фехъусын кодта Sputnik скъолайы директоры хæдивæг Кокойты Ирбег.
Ерысты бацæудзысты скъолайы æппæт секциты хъомылгæнинæгтæ столицæйæ, Дменисы хъæуæй æмæ Дзауы районæй.
"Нывæзтон скъолæйон ерыстæ ауадзыстæм. Рабæрæг кæндзыстæм тыхджындæрты, тренерты куысты гъæд, се ʻнтыстытæ æмæ рарасткæнинæгтæ. Фылдæр бæрцæй ерысты архайдзысты кæстæр къорды боксертæ - 2003-2004, 2005-2006, 2007-2008 æзты гуырд спортсментæ", - загъта Кокойты Ирбег.
Скъолайы мидӕггагон ерыстæ цæудзысты 15-16 июны.
Сывӕллӕтты ӕмӕ ӕрыгон фӕсивӕды боксы скъолæйæн секцитæ кусы столицæйы цалдæр ран æмæ республикæйы дыууæ районы. Спортивон уагдонæн разамынад дæтты советон цæдисы спорты мастер Кокойты Мурæт.
