ЦХИНВАЛ, 19 июн – Sputnik, Козаты Диана. Хуссар Ирыстоны Централон ӕвзарӕн къамис цыппӕрӕмы ауадздзӕн ӕвдӕм ӕрсидты парламенты фыццаг сесси, фехъусын кодта ЦӔК секретарь Авлохты Кристина.
Хуссар Ирыстоны 9 июны ацыдысты депутатты ӕвзӕрстытӕ, уыдон фӕстиуӕгӕн парламенты бынӕттӕ райстой фондз политикон парти ӕмӕ 17 иумандатоны.
"Ног паралменты фыццаг рабадт ацӕудзӕн цыппӕрӕмы, 20 июны, закондӕттӕн органы рабадтыты залы. Конституцимӕ гӕсгӕ, уый уадзы ЦӔК. Фыццаг сессийыл ӕвзӕрст ӕрцӕудзӕн парламенты спикер, - загъта Авлохты Кристина.
Ӕвзӕрстыты фӕстиуӕгӕн ног парламенты фылдӕр бынӕттӕ ногӕй бацахста парти "Иугонд Ирыстон" - уый раста авд мандаты партион номхыгъдмӕ гӕсгӕ, авд та сты, партийы номӕй сӕхи чи раразмӕ кодта, уыдон.
Дыккаг бынатыл ис "Адӕмон парти", ӕртыккагыл та "Ныхас". Афтӕ ма ног парламентмӕ бацыдысты "Дзыллӕйы иудзинад" ӕмӕ Коммунистон парти.
