ЦХИНВАЛ, 9 июл — Sputnik, Плиты Фатимæ. Цхинвалы хуссар-скæсæн кæрон социалон-экономикон райрæзты инвестицион нывæзты фæлгæтты самайдзысты сабидон. Социалон объект сараздзысты арæзтцæуæг бирæуæладзыгон хæдзæртты фарсмæ, фехъусын кодтой Sputnik арæзтады министрады пресс-службæйы.
ЦАРЗ у егъау микрорайон, фæстæдæр ноджы рауæрæхдæр уыдзæн - ныридæгæн дзы фæуд кæны дыууæ бирæуæладзыгон хæдзары арæзтад.
"160 бынатыл нымад сабидоны арæзтад райдайдзæн инвестицион нывæзты фæлгæтты микрорайон ЦАРЗ-ы 2020 азы. Горæты ацы хайы нæй сабидон", - загътой пресс-службæйы.
Уым ма банысан кодтой, районы фæуд кæны дыууæ бирæуæладзыгон хæдзары арæзтад, 2021 азы райдайдзæн æртыккаджы арæзтад.
"ЦАРЗ-ы ма самайдзысты ноджы иу 75 фатерон хæдзар. Йæ хæрдзтæ хаст сты инвестицион нывæзтмæ", - бафтыдтой уым.
Сабидоны арæзтадыл инвестицион нывæзты фæлгæтты хицæн æрцæудзæн 175 милуан сомы.
