ЦХИНВАЛ, 12 июл - Sputnik. Хуссар Ирыстоны гарзджын тыхты цӕттӕ кӕнынц резервистты рӕвдзытӕм, кӕцытӕ ацӕудзысты августы райдайӕны, хъусын кӕны республикӕйы Хъахъхъӕнынады министрады пресс-службӕ.
Ӕфсӕддон рӕвдзытӕ ауадзыны фӕдыл барамынд бафыста республикӕйы президент 5 июлы. Уыдон уагъд цӕуынц генералон штаб ӕмӕ гарзджын тыхты ахуырты фӕлгӕтты уӕрӕсейаг ӕфсӕддон базӕйы ӕфсӕддонты хайадистӕй.
"РХИ хъахъхъӕнынады министр инӕлар-лейтенант Гассеты Ибрагим ауагъта рабадт, цы ран хайад райстой хайӕдты командӕгӕнджытӕ, цӕмӕй снысан кӕной рӕвдзыты нывӕзт", - дзырдӕуы хъусинаджы.
Рабадты хайадисджытӕ радзырдтой министрӕн рӕвдзытӕм цӕттӕкӕнынады тыххӕй, уый фӕстӕ министр радта ӕмбӕлгӕ хӕслӕвӕрдтӕ командӕгӕнджытӕн.
"Резервисттӕм ӕрсидт хъуамӕ ацӕуа бӕрзонд ӕмвӕзадыл", - загъта министр.
Йӕ ныхӕстӕм гӕсгӕ, резервистты цӕттӕкӕнынад у республикӕйы ӕдасдзинад ӕххӕст кӕныны ахсджаиг хай.
Уагдоны пресс-службӕйы банысан кодтой, фарон резервистты рӕвдзытӕ Хуссар Ирыстоны кӕй ауагтой дыууӕ хатты. Уӕд Хъахъхъӕнынады министрады къухдариуӕгад банысан кодта мадзӕлтты бӕрзонд организацион ӕмвӕзад.
