ЦХИНВАЛ, 30 июл — Sputnik. Цӕгат Ирыстоны барадхъахъхъӕнӕг органтӕ бакодтой уголовон хъуыддаг Пятигорскы цӕрӕджы фӕдыл, кӕцы сӕххӕст кодта вандализмы акт "Мӕрдты горӕт"-ы территорийыл Цӕгат Ирыстоны, хъусын кӕны республикӕйы Мидхъуыддӕгты министрады (МХМ) пресс-службӕ.
Туристон объектмӕ балцы рӕстӕджы, ӕвзонг лӕппу райста сӕргӕхцтӕ зӕппадзтӕй, систа семӕ нывтӕ ӕмӕ ныммыхуыр кодта къамтӕ социалон хызӕгты.
"Архитектурон-этнографион комплекс "Мӕрдты горӕт"-мӕ балцы рӕстӕджы, турист сӕххӕст кодта ӕнӕфсарм митӕ, райста сӕргӕхцтӕ зӕппадзтӕй, систа семӕ нывтӕ ӕмӕ ныммыхуыр кодта къамтӕ йӕ фарсыл Instagram-ы", - дзырдӕуы хъусинаджы.
Полицийы кусджытӕ сбӕрӕг кодтой, цауы хайадисӕг кӕй у Пятигорскы 18-аздзыд цӕрӕг. Ӕвзонг лӕппуйы фӕдыл бакодтой уголовон хъуыддаг.
Дӕргъӕвс у хъӕу Цӕгат Ирыстоны Горӕтгӕрон районы. Хъӕуы цур территорийыл цардысты адӕм бронзӕйы ӕнусӕй фӕстӕмӕ. Хъӕу хъӕздыг у алыгъуызон архитектурон цыртдзӕвӕнтӕй, зындгонд у хӕстон мӕсгуытӕй ӕмӕ "Мӕрдты горӕт"-ӕй, кӕцыйы ис 97 зӕппадзы. "Мӕрдты горӕт" у Цӕгат Ирыстоны иууыл цымыдисондӕр историкон фендтаг бынӕттӕй иу.
