ЦХИНВАЛ, 2 авг - Sputnik. Хуссар Ирыстоны столицӕйы сӕвӕрдтой дидинджытӕ ӕмӕ веноктӕ Ӕнусон артмӕ Каде аллейыл Уӕлдӕфон-десантон ӕфсӕдты (УДӔ) боны цытӕн, церемонийы хайад райста президент Бибылты Анатолий.
Ӕнусон арты цур ӕрӕмбырд сты Маргеловы номыл Рязаны уӕлдӕфон-ӕфсӕддон ахуыргӕнӕндоны курсанттӕ, афтӕ ма УДӔ ветерантӕ.
Паддзахады сӕргълӕууӕг раарфӕ кодта ветерантӕн бӕрӕгбоны цытӕн.
Дидинджыты сӕвӕрды фӕстӕ Бибылты Анатолий радзырдта журналисттӕн, бӕрӕгбон ахсджиаг кӕй у йӕхицӕн ӕмӕ алкӕмӕндӕр, чи службӕ кодта уӕлдӕфон-десантон ӕфсӕдты.
"Советон Цӕдисы Хъайтар Василий Маргелов дзырдта, УДӔ-мӕ чи нӕ бахаудта, уый хъуамӕ цин кӕна, чи бахаудта, уый та хъуамӕ сӕрыстыр уа. Мӕ хъуыдымӕ гӕсгӕ, махӕй алчидӕр сӕрыстыр у, уым кӕй службӕ кодтам", - загъта президент.
Президент ма бафтыдта, зӕгъгӕ, адӕймаг алыхатт дӕр хъуамӕ размӕ цӕуа зындзинӕдтӕм ӕнӕкӕсгӕйӕ.
"Ацы принциптӕ алыхатт дӕр ӕххуыс кӕнынц", - банысан кодта паддзахады сӕргълӕууӕг.
Бибылты Анатолий хайад райста автозгъорды, кӕцы сорганизаци кодтой ацы бӕрӕгбоны цытӕн.
