ЦХИНВАЛ, 13 авг - Sputnik. Хуссар Ирыстон ӕмӕ Севастополы хсӕн ӕмгуыстады фӕдыл бадзырд фӕнд кӕнынц бафыссын августы кӕрӕтты. Горӕт ӕмӕ республикӕ дих кӕндзысты сӕ фӕлтӕрддзинад культурӕ, спорт ӕмӕ ахуырады къабӕзты.
Уый тыххӕй фехъусын кодтой Хуссар Ирыстоны президент Бибылты Анатолий ӕмӕ Севастополы губернаторы хӕстӕ ӕххӕстгӕнӕг Михаил Развожаевы фембӕлды рӕстӕджы.
"Дыууӕварсон фембӕлды Бибылты Анатолий ӕмӕ Михаил Развожаев ӕруынаффӕ кодтой иумӕйаг проектты реализацийы фадӕттыл базарадон-экономикон, зонадон-техникон, культурон, гуманитарон ӕмӕ социалон къабӕзты. Афтӕ ма ӕрдзырдтой Хуссар Ирыстон ӕмӕ Севастополы хсӕн ӕмгуыстады фӕдыл бадзырд бафыссыныл", - дзырдӕуы Севастополы хицауады пресс-службӕйы хъусинаджы.
Развожаев бахахх кодта, Севастополь ӕмӕ Хуссар Ирыстонӕн кӕй ис ӕппӕт фадӕттӕ ӕмӕ ресурстӕ дӕр ӕмгуыстад райтынг кӕнынӕн.
Бадзырды бафыст ӕрӕмных кӕндзысты Хуссар Ирыстоны Хӕдбардзинад банымайыны бӕрӕгбонмӕ.
