ЦХИНВАЛ, 16 авг – Sputnik, Плиты Фатимæ. Хуссар Ирыстоны информацион-музыкалон радио "Ир" æвдæм августæй æрурæдта йæ куыст. Дзыллон информацион фæрæзæн æввахс бонты самал кæндзысты сигнал дæттæн ифтонгад æмæ уал фыццаг рады сног кæндзæн йæ куыст столицæйы, уый фæстæ та скусдзæн районты дæр, фехъусын кодта Sputnik паддзахадон информацийы комитеты сӕргълӕууӕг Хъотайты Мария.
Паддзахадон радио "Ир" йæ куыст æрурæдта æвдæм августы, йæ аххосаг уыд фидиуӕны куысты æвзæр гъæд фæстаг цалдæр мæйы.
"Сигнал цы передатчик дæтты, уымæн йæ куысты æмгъуыд фæцис цалдæр азы размæ. Фæстаг æзты-иу æдзух фæзынд згъуыдтытæ, æгæр стæмæй ыл уымæл боныгъæд дæр æндæвдта, рæстмæ нæ ахста горæты тыгъдады дæр", - загъта Хъотайты Мария.
Уый ма банысан кодта, президент сын ныфс бавæрдта бамбæрзын сигнал дæттæн ифтонгад самал кæныны хæрдзтæ.
"Иу сигналæрвитæн ифтонггарз аххæсдзæн столицæйыл, ноджы ма æртæ та бамбæрздзысты районтæ дæр. Сæ иу лæууы æртæ сæдæ минмæ æввахс. Фыццаг передатчик бастдзинады комитет самал кæндзæн æввахс бонты", - бафтыдта уый.
Радио "Ир" у республикæйы иууыл рагондæр дзыллон информацийы фæрæзтæй иу - фыццаг хатт айзӕлд 1932 азы 11 апрелы.
