ЦХИНВАЛ, 20 авг — Sputnik. Фӕсивӕдӕн, кӕцы цӕуы Хуссар Ирыстоны районтӕм кусынмӕ, мах хъуамӕ уӕм бузныг. Уый тыххӕй фехъусын кодта хицауады сӕрдар Пухаты Эрик кусӕгон балцы рӕстӕджы Къуайсамӕ.
Президент ӕмӕ хицауады пресс-службӕты разамонӕг Чилӕхсаты Тамара радзырдта Sputnik, Къуайсайы Пухаты Эрик кӕй бабӕрӕг кодта рынчындон ӕмӕ фембӕлд сӕйраг дохтыр Цхуырбаты Ульянаимӕ. Уыдон ӕрдзырдтой медицинон уагдоны актуалон фарстытыл.
Цхуырбаты Тамара банысан кодта, рынчындоны кӕй ис алы уавӕртӕ дӕр медицинон персоналы куыстӕн ӕмӕ рынчынтӕн хоскӕнынӕн, фӕлӕ дзы ис нарӕг дӕсниӕдты цухдзинад.
"Нал нӕм ис стоматологон кабинетимӕ проблемӕ. Нӕ зӕрдӕмӕ цӕуы дохтыры куыст", - бахахх кодта Цхуырбаты Тамара.
Стоматологон кабинеты пациенттӕ загътой бузныг дохтыр Сиукъаты Ингайӕн ӕмӕ йын банысан кодтой ӕрмӕст йӕ профессионализм нӕ, фӕлӕ ма йӕ адӕймагон миниуджытӕ дӕр.
Сиукъаты Инга банысан кодта, столицӕйы ваканситӕ кӕй нӕ уыд, ӕмӕ уый фӕдыл аскъуыддзаг кодта бакусын районы.
"Стоматологон кабинеты ис нырыккон ифтонггарз, ӕмӕ уый руаджы мӕ бон ӕххӕст кӕнын у мӕ куыст ӕмбӕлгӕ ӕмвӕзадыл", - загъта медик.
Хицауады сӕрдар бахахх кодта, фӕсивӕд кӕй нӕ цӕуы районтӕм, фӕлӕ уым ис дохтырты ваканситӕ, хорз инфраструктурӕ ӕмӕ транспортон бастдзинад.
Пухаты Эрик загъта бузныг ӕвзонг адӕмӕн, кӕцытӕ нӕ ӕнхъӕлмӕ кӕсынц горӕты вакантон бынӕттӕм сӕ квалификаци сафгӕйӕ, фӕлӕ ӕрцӕуынц районтӕм ӕмӕ райдайынц кусын.
