ЦХИНВАЛ, 28 авг — Sputnik. Фӕстаг фӕстиуджытӕм гӕсгӕ, кӕцытӕ фехъусын кодта Абхазы Централон ӕвзарӕн къамис (ЦӔК) дыццӕджы, президентон ӕвзӕрстыты дыккаг турмӕ ахызт республикӕйы ныры президент Рауль Хаджимба (24,83%) ӕмӕ оппозицион парти "Амцахара"-йы лидер Алхас Квициния (22,91%), хъусын кӕны Sputnik Абхаз.
"Мах райстам фӕстиуджытӕ, се хсӕн документтӕ Мӕскуы, Черкесск ӕмӕ Турчы фадгуытӕй. Развӕлгъау фӕстиуджытӕ расидыны рӕстӕджы ӕрцыд бӕрӕггӕнӕнты техникон фехӕлд, кӕцы нӕ бандӕвта кандидатты фӕстиуджытыл", - загъта ЦӔК сӕрдар Тамаз Гогия.
Уый бафтыдта, кӕронбӕттӕн багӕрст кӕй нӕ фӕивта ӕвзӕрстыты фӕстиуджытӕ.
"Ӕвзарджыты номхыгъдмӕ кӕй бахастой, уыцы ӕмбӕстӕгты нымӕц у 126, 950 адӕймаджы, сӕйраг номхыгъд у 117, 776 адӕймаджы. Уӕлӕмхасӕн номхыгъдтӕм бахастой 9174 ӕвзарӕджы, ӕмбӕсгты нымӕц, кӕцытӕ хайад райстой хъӕлӕсдӕттыны – 82753 адӕймаджы", - загъта Гогия.
Бюллетеньты нымӕц, кӕцыты схъӕлӕс кодтой алкӕцы кандидаты ныхмӕ дӕр у 1666, 4693 бюллетены банымадтой ӕнӕхъомысыл. Хъӕлӕсдӕттыны хайад райстой ӕвзарджыты 65,18 проценты.
Абхазы президенты ӕвзӕрстытӕ ацыдысты хуыцаубоны, 25 августы. Фыццаг туры уӕлахиздзауы не сбӕрӕг кодтой, ӕмӕ уый фӕдыл 8 сентябры республикӕйы ногӕй ацӕудзӕн хъӕлӕсдӕттын. Куыд ӕхсӕнадӕмон цӕстдарджытӕ, афтӕ ӕвзӕрстыты хайад райста Хуссар Ирыстоны делегаци дӕр.
