ЦХИНВАЛ, 28 авг — Sputnik. Беслæны трагедийы амæттæгты рухс ном ссардзысты Мæскуыйы, хъусын кæны Мæскуыйаг ирон æхсæнады пресс-службæ.
Мысæн мадзæлттæ ацæудзысты 3 сентябры.
"Мæскуыйы центры, Фырсыгъдæг Мад Майрæмы Райгуырды аргъуаны (Алайнаг кæрт) 12.20 сахатыл уагъд æрцæудзæн панихидæ 2004 азы сентябры Беслæны трагедийы амæттæгты мысынæн. 13.00 сахатыл ацæудзæн мысæн акци аргъуаны раз, æрæмбырдуæвджытæ иу уысм æдзææй алæугæйæ ссардзысты амæттæгты ном, сæвæрдзысты дидинтæ æмæ арвмæ суадздзысты 334 урс тымбылæджы", - дзырдæуы хъусинаджы.
Уыцы бон ма дидинджытæ æмæ веноктæ сæвæрдзысты УФ сæрмагонд дæлхайæдтæ "Альфа", "Вымпел" æмæ УУМ кусджыты ингæнтæм, кæцытæ фæмард сты Беслæны сабиры амынæтæй ирвæзынгæнгæйæ.
2004 азы 1 сентябры террористтæ бацахстой Беслæны фыццæгæм скъола æмæ амынæты систой 1128 адæймаджы, кæцыты æртæ боны хъизæмарæй мардтой. Теракты фæстиуæгæн бабын ис 334 адæймаджы.
