ЦХИНВАЛ, 17 окт — Sputnik, Плиты Фатимæ. Хуссар Ирыстоны уæззау атлетикæйы скъолайы хъомылгæнинаг Икъаты Сæрмæт стох кæндзæн Мæскуыйы уагъд цӕуӕг Дунейы кубокы пауэрлифтингæй, фехъусын кодта Sputnik штангисты тренер Плиты Артур.
Ерыстæ цæудзысты октябры кæрон, турниры æнхъæлмæ кæсынц спортсментæм Уæрæсе, Беларусь, Куба, Эстони, Инди, Иран æмæ æндæр бæстæтæй.
"Сæрмæт у иттæг хорз цæттæ спортсмен, йæ бирæнымæц уæлахизты нымæцы ис ацы турниры æнтыст дæр. Ныр дæр цæуы радон уæлахизмæ", - загъта Плиты Артур.
Икъаты Сæрмæт стох кæндзæн 125 кг уæзы пауэрлифтингы дисциплинæйы.
Уый ма банысан кодта, ацы ерыстӕ кæй сты ӕвзарӕн этап дунейы чемпионатмӕ.
Икъаты Сӕрмӕт у Европӕйы чемпионаты ӕртӕ хатты уӕлахиздзау, дунейы дыууӕ хатты чемпион.
Спортсмен 18 азæй фæстӕмæ рамбылдта 50–мæ æввахс фыццаг бынаты хицæн æмвæзады ерысты. Цхинвалы спортсмены цæттæ кæнынц уæззау атлетикæйы скъолайы тренертæ Плиты Артур æмæ Габаты Ацæмæз. Скъолайæн разамынад дæтты Советон Гуырдзыстоны бирæ хатты чемпион, æхсæнадæмон классы спорты мастер уæззау атлетикæйæ Тасойты Олег.
