ЦХИНВАЛ, 17 окт - Sputnik, Гӕбӕраты Элина. Бизнесмен Хетӕгкаты Нугзарӕн 15 азӕй фылдӕр ис амалиуӕгад – Цхинвалы уымӕн ис сантехникӕ ӕмӕ хӕдзарадон базайрӕгты дукани. Дыууӕ азы размӕ та лæппу райдыдта фыцын дзул йӕ бинонтӕн. Уый фӕстӕ йӕм райдыдтой цӕуын заказтӕ йӕ зонгӕтӕй.
Амалиуӕггӕнӕг бирӕ ӕзты нӕ хӕры дуканийы дзул, уый нымайы, хӕринаг кӕй хъуамӕ уа пайда организмӕн.
Нугзар дзул фыцы рагон рецептмӕ гӕсгӕ – ӕнхъизӕныл, ӕрмӕстдӕр хорӕй, кӕцы зайы Хуссар Ирыстоны.
"Арӕх мӕ фӕрсынц, куыд ӕрымысыдтӕн ацы рецепт. Фӕлӕ ӕз ногӕй ницы ӕрхъуыды кодтон, нӕ фыдӕлтӕ дзул фыхтой ӕнхъизӕныл ӕмӕ адӕм уыдысты ӕнӕниздӕр. Ныр та мах райдытам ӕлхӕнын ссад, уымӕй дарддӕр хъӕуты дӕр дзул ӕлхӕнын райдыдтой", - загъта уый.
Йӕ дзултӕн Хетӕгкаты Нугзар хор ӕлхӕны Цхинвалы районы фермерӕй, уый фӕстӕ йӕ йӕхӕдӕг рассы.
Нугзар не ууӕнды уӕлдӕр сорты ссадыл, уымӕн ӕмӕ зоны, куыд ӕй аразынц, ӕмӕ куыд ӕндавы организмыл.
Дзулфыцӕг радзырдта, ӕцӕг дзул у тынг пайда организмӕн.
"Хор у хъӕздыг пайда микроэлементтӕй, уым бирӕ ис белок ӕмӕ клетчаткӕ. Ахӕм дзулӕй пайда кӕнын у низты профилактикӕ. Хӕринаг хъуамӕ уа натуралон, экологон сыгъдӕг ӕмӕ ӕнӕ химийӕ", - банысан кодта амалиуӕггӕнӕг.
Нугзар иу мӕймӕ фыцы ӕрмӕстдӕр 50 дзулмӕ ӕввахс. Вӕййы йӕм дыууӕ хуызы дзул – 700 ӕмӕ 350 граммы дзултӕ.
"Къуыри фыцын дыууӕ хатты. Уый бизнес нӕу, фӕнды мӕ фӕхай кӕнын адӕмӕн мӕ фӕлтӕрддзинад. Ӕфтиаг дзы цъус ис, уӕй йӕ кӕнын йӕхи аргъӕй – 150 сомӕй", - бахахх кодта Нугзар.
Дзулмӕ хаттӕй-хатт бафтауын цъойы ссад, фӕлӕ цъой республикӕйы нӕ зайы, уый фӕдыл йӕ балхӕнын Цӕгат Ирыстоны.
Уымӕй дарддӕр ма ӕрласгӕ продукттӕй Нугзар пайда кӕны цӕхх ӕмӕ чисмисӕй.
Хетӕгкаты Нугзары ауӕрӕх кӕнит йӕ амалиуӕгад, кӕд йӕ дзулӕн ӕлхӕнджытӕ уа, уӕд. Фӕлӕ нырма заказтӕ бирӕ нӕй дзулы стыр аргъы тыххӕй.
