ЦХИНВАЛ, 23 окт — Sputnik. Хуссарирыстойнаг футболон клуб "Цхинвал" хайад райсдзӕн Цӕгат Кавказы ӕмӕ Хуссар федералон зылдты Чемпионты лигайы, хъусын кӕны республикӕйы фӕсивӕдон политикӕ, спорт ӕмӕ туризмы комитеты пресс-службӕ.
Егъау турнирмӕ балцӕг цхинвайлаг командӕ райста Цӕгат Ирыстоны чемпионаты уӕлахизы руаджы.
"Турниры хайадисджытӕ уыдзысты Хуссар федералон зылд ӕмӕ Цӕгат Кавказы федералон зылды регионалон чемпионатты уӕлахиздзаутӕ. Фыццаг хъазты, 3 ноябры "Цхинвал" уазӕгуаты фембдзӕн Хъӕрӕсе-Черкесы чемпионимӕ, дыккаг хъазт ацы командӕимӕ ацӕудзӕн 6 ноябры", - дзырдӕуы хъусинаджы.
Пресс-службӕйы бафтыдтой, зӕгъгӕ, турниры уӕлахиздзау хайад райсдзӕн Уӕрӕсейы Федерацийы Чемпионты лигайы.
