ЦХИНВАЛ, 30 окт — Sputnik, Плиты Фатимӕ. Хуссар Ирыстоны Дзауы районы ахицæн сты Хуссар Иры хъайтар Санахъоты Геннадийы фыццаг номарæн æппæтирыстонон ерыстæ боксæй. Уæлахиздзаутæ фæбæрæг сты 20 категорийы, чемпионтæ райстой хорзæхтæ турниры организаторæй æмæ хъайтары бинонтæй.
Гом турнир нывонд уыд Ирыстоны хъайтар, боксы спорты мастермæ кандидат, юниорты хсæн Казахстаны чемпион, юниорты хсæн Уæрæсейы фыццагады уæлахиздзау Санахъоты Геннадийæн.Мадзал бабæрæг кодта республикæйы разамынад æмæ æдзард хъайтары бинонтæ.
"Адæймагæн иууыл стырдæр цырт у йæ ном куы цæра, уый. Æз бузныг зæгъын чи рбацыд, уыдонæй алкæмæндæр, организатортæ æмæ республикæйы разамынадæн абоны тыххæй. Сидын уæм, хъахъхъæнут уæ зæнæг, кувут сын – ныййардæджы фæдзæхст денджызы бынæй дæр фервæзын кæндзæн. Ӕз æвæццæгæн хорз нæ куывтон. Уæ зæнæгæн иузæрдион æмгæрттæ уæт, кæцытытæ тыхст сахат сæ фарсмæ уыдзысты", - загъта Зассеты Жанна.
Тохты архайдтой 100 спортсмены бæрц, се ʻхсæн уыдысты Хуссар Иры боксертæ æмæ иу командæ Цæгат Ирыстоны горæтгæрон районæй.
"Дыууæ кары категорийыл дих уыдысты спортсментæ, алкæцыйы кары дæр уыд 10 уæзы категория. Ерыстæ рабæрæг кодтой æмтæй 20 уæлахиздзауы, чемпионтæ организатортæй дарддæр растой дзæнæттаг Санахъоты Геннадийы бинонтæй призтæ. Спортсментæй дарддæр ма цыт кодтой тренертæн дæр", - загътой Sputnik Дзауы районы пресс-службæ.
Санахъоты Геннадий фæмард ис 2004 азы Гуырдзыйы æрбабырстты рæстæджы Тлиахъаны бæрзæндыл тохы рæстæджы. Ууыл гуырдзиæгтæ æрхъула кодтой æмæ сæм бахауд амынæты уæззау цæфтимæ. Æххуысы бæсты лæппуйæн ноджы фæфыдмитæ кодтой. Санахъоты Геннадий йæ мæрдон буар куы ссардтой, уæд ын базонæн дæр нал уыд.
