ЦХИНВАЛ, 31 окт — Sputnik, Плиты Фатимӕ. Хуссар Иры каратисттæй дыууæ ссисты Уæрæсейы фыццагады бронзæйон призертæ Киокусинкай каратэйӕ. Спортивон кады пьедесталмæ схызтысты Дудайты Доннӕ æмæ Тадтаты Софья, фехъусын кодта Sputnik спортсменты тренер Созайты Владимир.
Чызджытæ æдзух сты ацы æмæ æндæр æппæтуæрæсейон ерысты уæлахиздзауты æмæ призерты нымæцы.
"Алы хатт дæр тырнæм хуыздæр хатдзæгмæ. Гæнæн ис, чызджытыл бандæвта мидтыхст, науæд æдзух ерыстæ. Куы сын вæййы æвæрццаг, куы та æппæрцаг æндæвдад. Уый дæр æвзæр хатдзæг нæу, дарддæр нæм æнхъæлмæ кæсынц ног ерыстæ, равдисдзысты ноджы хуыздæр бæрæггæнæнтæ", - загъта Созайты Владимир.
Уæрæсейы фыццагад Киокусинкай каратэйӕ цыд 25-28 октябры Ульяновскы. Ам майдантыл тохы бацыд 760 спортсмены.
"Ерысты æмвæзад уыд тыхджын бæрзонд – æмткæй дзы архайдта 760 спортсмены, иу категорийы тох кодтой 20 спортсмены онг", - бафтыдта тренер.
Дудайты Доннӕ архайдта 14-15 кары спортсменты хсæн 50 килограммы уæзы, ацы уæзы архайдта Тадтаты Софья дæр, уый та 16—17 кары спортсменты ʻхсæн.
