ЦХИНВАЛ, 4 ноя - Sputnik. Хуссар Ирыстоны Паддзахадон университеты ректор Тедеты Вадим бафыста бадзырд Фонд "Уырыссаг дуне"-йы къухдариуӕгадимӕ университеты фонды Центр бакӕныны фӕдыл. Документ бафыстой Фонд "Уырыссаг дуне"-йы ХIII Ассамблейы куысты рӕстӕджы, радзырдта Sputnik ХИПУ медиахолдингы директор Джиоты Алла.
Фонды ӕххӕстгӕнӕг директор Владимир Кочин банысан кодта, кӕй райдыдтой иумӕйаг куыст ӕххӕст кӕнын.
"Уый у нӕ иумӕйаг куысты райдайӕн. Мах уырны, куыст кӕй уыдзӕн ӕнтыстджын ӕмӕ нын уыдзӕн уӕрӕх интеграци. Фонд "Уырыссаг дуне" баххуыс кӕндзӕн ХИПУ-йы Центры техникон ифтонгадӕн, афтӕ ма рахицӕн кӕндзӕн ӕнӕмӕнгхъӕуӕг методикон ӕмӕ зонадон литературӕ куыстӕн", - загъта уый.
Ахуыргӕнӕндоны ректор загъта бузныг ХИПУ-йы Центр бакӕныны тыххӕй.
"Тыбылты Александры номыл Хуссар Ирыстоны паддзахадон университет у дыууӕ дунейы центр Хуссар Ирыстоны: ирон ӕмӕ уырыссаджы. Алцыдӕр араздзыстӕм, цӕмӕй дарддӕр размӕ кӕнӕм уырыссаг культурӕ, ӕвзаг ӕмӕ истори", - бахахх кодта Тедеты Вадим.
ХИПУ-йы фонды Центры разамонӕгӕй банхъардтой снысан кӕнын филолог Остъаты Джульеттайы.
Уымӕй дарддӕр ХИПУ медиахолдинггы директор Джиоты Алла фехъусын кодта, фембӕлды рӕстӕджы кӕй бадзырдта телекомпани "Уырыссаг дуне"-йы директор Всеволод Железновимӕ сӕ каналыл ХИПУ ТВ ӕвдисыны тыххӕй.
