ЦХИНВАЛ, 5 ноя - Sputnik. Футболон клуб "Цхинвал"-ӕн ӕнтыстджынӕй ахицӕн ХФЗ ӕмӕ ЦКФЗ чемпионты лигӕйы 1/8 финал - уый уазӕгон матчы рамбылдта Хъӕрӕсе-Черкесы командӕ "Псыж"-ы, хъусын кӕны Хуссар Ирыстоны фӕсивӕдон политикӕ, спорт ӕмӕ туризмы комитеты пресс-службӕ.
Хъазт ахицӕн 4:2 хыгъдӕй цхинвайлӕгты пайдайӕн: пуртитӕ бакъуырдтой Джиголаты Сослан, Тедеты Станислав, дыууӕ хатты та расгуыхт Зассеты Алик.
"Мах нӕ зыдтам нӕ ныхмӕлӕууӕг командӕйы ӕмвӕзад, уымӕ гӕсгӕ райдыдтам нӕ хъазт хъахъхъӕнынӕй. Пуртитӕ иууылдӕр бакъуырдтам фыццаг таймы контратакӕты", - хъазтӕн комментаритӕ сарӕзта цхинвайлӕгты тренер Коцты Сослан.
Радон хъазт командӕты хсӕн ныр та ацӕудзӕн ӕртыццӕджы, 6 ноябры, Дзӕуджыхъӕуы.
ХФЗ ӕмӕ ЦКФЗ чемпионты лигӕмӕ балцӕг футболон командӕ "Цхинвал" райста Цӕгат Ирыстоны чемпионаты уӕлахизы фӕрцы.
