ЦХИНВАЛ, 19 ноя — Sputnik, Плиты Фатимæ. Хуссар Ирыстоны фыццаг президент, историон зонæдты доктор, профессор Цыбырты Людвиг дыццæджы нысан кæны йæ райгурырæн бон. Дзырддзæугæ политикыл 19 ноябры æххæст кæны 87 азы.
Цыбырты Людвиг Хуссар Иры ног историмæ бацыд куыд хæдбар æвзонг бæстæйы фыццаг президент. Паддзахады разамонæджы бынаты уыд 1996—2001 æзты.
Йæ райгуырæн боныл экс-президент æмбæлы Цæгат Ирыстоны.
"Хæдзары уыдзæн, юбилейон датæ нæу æмæ йæ никуыд нысан кæнын. Кæд мæм мæ хиуæттæй исчи æрбацæуа, уæд абаддзыстæм", - загъта Sputnik Цыбырты Людвиг.
Хуссар Иры фыццаг президент Цыбырты Людвиг райгуырд Цхинвалы районы Зары хъæуы, уым каст фæцис астæуккаг скъола, ахуырадон уагдон абон хæссы йæ дзæнæттаг чызг Маринайы рухс ном.
Фидæны президент йæ балц стыр политикæмæ райдыдта 1993 азы, уый ссис Хуссар Иры Уæлдæр советы сæрдар. 1996 азы 10 ноябры æвзæрст æрцыд Хуссар Иры президентæй.
Ахадгæ сты йæ зонадон куыстытæ дæр. Цыбырты Людвигæн ис 160 зонадон куысты бæрц, йæ хъусдары бын сты ирон адæмы этнографи, истори æмæ культурæйы фарстытæ. Йæ сæйраг зонадон куыстыты нымæцы сты: "Осетинское народное жилище", "Народный земледельческий календарь осетин", "Древнейшие пласты духовной культуры осетин", "Встречи с Васо Абаевым", "Периодическая печать Кавказа об Осетии и осетинах", "Ирон адæмон бæрæгбæттæ" æмæ æндæртæ.
