ЦХИНВАЛ, 2 дек — Sputnik. Цӕгатирыстойнаг греко-римаг стилы хъӕбысӕйхӕцджытӕ Тыбылты Георгий ӕмӕ Чертхъоты Уырызмӕг рамбылдтой сыгъзӕрин майдантӕ Цӕгат Кавказы федералон зылды (ЦКФЗ) чемпионаты, хъусын кӕны республикӕйы спорты министрады пресс-службӕ.
Турнир уагъд цыд 20 ноябрӕй 1 декабрмӕ Махачкалайы (Дагестан). Спортсментӕ майдантӕй дарддӕр тох кодтой Уӕрӕсейы чемпионаты хайад райсыны барыл. Ерысты хатдзӕгтӕм гӕсгӕ, Цӕгат Ирыстоны командӕ рамбылдта авд хорзӕхы.
"ЦКФЗ чемпионты сӕ уӕзы категориты уӕлахиздзаутӕ ссисты Тыбылты Георгий (60 килограмм), кӕцы рамбылдта Иса Микаевы (Цӕцӕн) ӕмӕ Чертхъоты Уырызмӕг (63 килограмм), кӕцы фӕуӕлахиз Асланбег Шхагошевыл (Кӕсӕг-Балхъар)", - дзырдӕуы хъусинаджы.
Афтӕ ма турниры бронзӕйон призертӕ ссисты Гугкаты Давид (67 килограмм), Хъожиты Азӕмӕт (77 килограмм), Кортиаты Артем (82 килограмм), Хуыгаты Аслан (87 килограмм) ӕмӕ Назар Райок (130 килограмм).
