ЦХИНВАЛ, 26 дек - Sputnik, Плиты Фатимæ. Ӕнæниздзинад хъахъхъæнынады министрад Хетæгкаты Къостайы номыл паддзахадон театримæ иумæ цæттæ кæнынц ногазон лæвар низæфхæрд сывæллæттæн. Спектакль "Хæлæрттæ" сæрмагондæй равдисдзысты сахъат æмæ уæззау рынчын сывæллæттæн, кæцытæн се 'нæниздзинад фадат нæ дæтты театырдзау суæвынæн, фехъусын кодта Sputnik театры аивадон къухдариуæггæнæг Дзудцаты Тамерлан.
Равдыст ацæудзæн цыппæрæмы, 26 декабры, Ӕнæниздзинад хъахъхъæнынады министрады бæстыхайы боны æртæ сахатыл.
"Фыццаг хатт аразæм ахæм мадзал. Артисттæ иууылдæр равдыстой сæ разыдзинад. Сахъат æмæ рынчын сабитæй сæ фылдæрæн уый суыдзæн сæ фыццаг бацыд аргъаумæ", - загъта Дзудцаты Тамерлан.
Спектакль "Хæлæрттæ" театры труппæимæ иумæ сæвæрдта уагдоны аивадон къухдариуæггæнæг Дзудцаты Тамерлан йæхи фыст сценариймæ гæсгæ.
