Телепроект "Кафт" паддзахадон телеуынынады уыд уникалон фæзынд. Хайад дзы райстой скъоладзаутæ. Семæ куыстой профессионалон хореографтæ, кæцытæ сывæллæттæн равдыстой ирон кафты аивдзинад. Зассеты Вадим ссис дыккаг къæпхæны уалахиздзау.
"Ацы проекты размæ кæд традицион ирон кафт кодтон, уæд ныр та фыццаг хатт федтон, куыд ис аивадон æвæрæн кафтæн", - загъта Зассеты Вадим.
Проекты номинациты уыд хæстон темæ, æмæ хореоргафы амындмæ гæсгæ уыдон кафты руаджы равдыстой концлагеры цард. Вадимы ныхæстæм гæсгæ, уый кæд уыд зын, уæддæр дзы бавзæрста ирд эмоцитæ.
Банысан кæнын ма хъæуы уый æмæ Зассеты Вадим уыд Чилæхсаты Георгийы командæйы сконды.
"Фæндыд мæ нæлгоймаг хореографимæ бакусын, уымæн æмæ классикон хореоргафийы Георгий у иттæг дæсны", - банысан кодта Вадим.
Зассеты Вадим рамбылдта 50 мин сомы, куыд дыккаг бынаты призер. Йæ ныхæстæм гæсгæ, уый æхцайы фæрæзтæ бахардз кæндзæн ацы аз скъолайы рауагъдмæ.
