ЦХИНВАЛ, 17 фев — Sputnik. Уӕгъдибар хъӕбысӕйхӕцӕг Ирыстонӕй Найфонты Артур схызт Европӕйы чемпионаты кады пьедесталы уӕлдӕр къӕпхӕнмӕ, хъусын кӕны Цӕгат Ирыстоны спорты министрады пресс-службӕ.
Знон Римы ацыдысты финалон тохтӕ 61, 74, 86, 92 ӕмӕ 125 килограммы уӕзы категориты.
"Финалон тохы 86 килограммы уӕзы категорийы Найфонты Артур рамбылдта спортсмены Сан-Маринойӕ Милес Амины 4:0 хыгъдӕй", - дзырдӕуы хъусинаджы.
Римы уӕлахиз ӕрхаста цӕгатирыстойнаг уӕгъдибар хъӕбысхӕсты скъолайы 22 аздзыд минӕварӕн дыккаг сыгъзӕрин майдан Европӕйы чемпионаты. Спортсмены ерыстӕм бацӕттӕ кодтой Ӕрчъеккаты Тотрадз ӕмӕ Дудайты Эльбрус.
