ЦХИНВАЛ, 20 фев - Sputnik, Плиты Фатимæ. Хуссар Ирыстоны Хӕххон къахдзоныгъты спорты федераци республикæйы кæстæр фæлтæры хуыздæр спортсменты акæндзæн Цъæйы коммæ, фехъусын кодта Sputnik федерацийы хистӕр Тедеты Лери.
Спортсментæ Цæгат Ирыстонмæ афæндараст уыдзысты ног къуыри, æртыццæджы.
"Балцæгты хицау бауыдзысты республикæйы спортсментæй турнирты æдзух уæлахиздзаутæ. Алкæцы секци дæр равзардзæн фæйнæ минæвары, кæцытæ цæсты бахуадысты се ʻнтыстытæй азы дæргъы", - загъта Тедеты Лери.
Уый ма банысан кодта, федерацийы тыхтæй æмæ президенты финансон æххуысæй, Дзауы скъола-интернаты сывæллæтты иу къорд ныридæгæн кæй сты Цъæйы.
"Цъæйы комы ныл фембæлд Къуаисайæ рацæугæ Джиоты Андрей æмæ куы базыдта, уым улæфынц интернаты сывæллæттæ, уыд сын бакодта финансон æххуыс 25 мин сомæй", - бафтыдта уый.
Цъæйы комы хæххон курортмæ федераци аразы балцытæ æххуысхъуаг бинонты зæнæг æмæ скъола-интернатты хъомылгæнинæгтæн.
