ЦХИНВАЛ, 20 фев - Sputnik, Плиты Фатимæ. Хуссар Ирыстоны конд цæуы къахдзоныгъты секци, йæ куыст срæвдз кæндзæн ифтонгады æппæт гуырахст балхæды фæстæ, фехъусын кодта Sputnik Хӕххон къахдзоныгъты спорты федерацийы хистӕр Тедеты Лери.
Сывæллæттæн бырæн ифтонгады фылдæр хай æлхæд æрцыд, аннæтæ сты фæндагыл.
"Фондз комплект райстам, ноджы ма аст та сты фæндагыл. Ӕхсæз-авд азы кары сывæллæтты райдайдзыстæм исын. Цалдæр арæхстджын лæппу уæлæмхас цæттæдзинады ахуыртæ рацæуыны фæстæ райдайдзысты кусын тренертæй. Ахуыртæ цæудзысты Цæгат Ирыстоны(Цъæй) æмæ Хуссар Ирыстоны", - загъта уый.
Хуссар Ирыcтоны Хӕххон къахдзоныгъты æмæ сноуборды федераци арæзт æрцыд 2016 азы майы. Федераци æрвылмæй исы финансон æххуыс президенты сæрмагонд фондæй, уый фæрцы бырæн сезон скъолайы кары дæсгай сывæллæттæ æххуысхъуаг бинонтæй ацæуынц Цъæйы коммæ.
